ჩვენს შესახებ
მინაძის მარანი ფერსვი მდებარეობს იმერეთის რეგიონში, სოფელ ფერსათში. ესაა მცირე საოჯახო მეღვინეობა 4 თაობის ისტორიით, ღვინის დაყენების იმერული წესით, ბუნებრივი მევენახეობით და მეღვინეობით.
ჩვენს ოჯახში ღვინის დაყენების ტრადიციას საფუძველი ჩაუყარა ჩვენმა დიდმა ბაბუამ ტარასი მინაძემ (1878-1978). მან საფრანგეთიდან ანანოვებთან ერთად ჩამოიტანა ყურძნის საჭყლეტი მექანიკური დანადგარის მოდელი. ბაბუა პირველი იყო ვინც საქართველოში ამ დანადგარის ანალოგების დამზადება დაიწყო და რაც მთავარია ჩვენ დღესაც ვიყენებთ მის დამზადებულ ყურძნის საჭყლეტ მანქანას.
უკვე 2018 წელს მეღვინეობას ახალი სახე მისცა ოჯახის უფროსმა ვაჟმა ირაკლი მინაძემ და პირველად ჩამოვასხით ბოთლში 2017 წლის ცოლიკაურის და ძელშავის ღვინოები. მანამდე 2009 წელს ღვინო მონაწილეობდა საოჯახო მარნების ღვინის ფესტივალზე სადაც იმერეთში მეორე საპრიზო ადგილი აიღო. ეს იყო ჩვენთვის ერთ-ერთი სტიმული, რომ მეტი გაგვესწავლა ღვინოზე და თამამად გაგვეგრძელებია ჩვენი ქვეყნის 8000 წლოვანი მეღვინეობის ისტორია.
მეღვინეობა 2018 წლიდან არის ასოციაცია ბუნებრივი ღვინის წევრი.
ვაწარმოებთ იმერული ჯიშის ყურძნებისგან დაყენებულ ღვინოებს: ციცქა,ცოლიკაური, კრახუნა, ოცხანური საფერე,ძელშავი.
ფერსვის ღვინოები ექსპორტით გადის აშშ-ში, პოლონეთში და საფრანგეთში.